“Pulu adamı işə götürəndə alarlar” – Akif Çovdarov

“Pulu adamı işə götürəndə alarlar” – Akif Çovdarov

Bu gün Sabunçu Rayon Məhkəməsinin binasında ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarov və onunla birlikdə həbs edilən üç MTN əməkdaşının məhkəmə baxışı davam etdirilib.

“Riyad Prodakşn” MMC olub, ya yox?

Virtualaz.org xəbər verir ki, məhkəmə iclası başlayan kimi təqsirləndirilən Akif Çovdarovun vəkili Sadiq Rəsulov vəsatətlə çıxış etdi. O bildirdi ki, Vergilər Nazirliyinə göndərdiyi sorğuya aldığı cavabda Şahmar Qurbanovun direktoru, Etibar Qasımovun təsisçisi olduğu deyilən “Riyad Prodakşn” MMC adlı təşkilatın qeydiyyatdan keçmədiyi məlum olub.

Xatırladaq ki, Şahmar Qurbanov zərgərlik fəaliyyəti ilə məşğul olduğu üçün Akif Çovdarov tərəfindən MTN-ə çağırıldığını və ondan 500 min dollar pul və 280 min dollar dəyərində qiymətli daşlar alındığını iddia edib. Həmin epizod üzrə məhkəmə baxışı yekunlaşıb.

Vəsatətlə çıxış edən vəkil Şahmar Qurbanovun hesabat dövründə hər hansı gəlirinin olub-olmaması və vergi ödəməsi barədə məhkəmənin Vergilər Nazirliyinə müraciət etməsini istədi. Qisa müşavirədən sonra vəsatət məhkəmə heyəti tərəfindən iş materiallarının lüzumsuz sənədlərlə doldurulmasına ehtiyac olmadığı əsası ilə rədd edildi.

Akif Çovdarovun kürəkəninə hörmətsizlik neçəyədir?

Zərərçəkmiş, keçmiş MTN-də idarə rəisi vəzifəsində işləmiş İlqar Aşurbəyovun ərizəsi əsasında epizodun məhkəmə istintaqı başladı.

Qısaca desək, Akif Çovdarov zərərçəkmişi təhdid edərək, ondan 300 min dollar “qopara” bilib. Buna səbəb isə Aşurbəyovun generalın kürəkəni Rəşad Əmircanova “hörmətsizliyi” olub.

İlqar Aşurbəyov kimdir?

Akif Çovdarovun özbaşınalığının və quldurluğunun növbəti qurbanı olan İlqar Aşurbəyov Azərbaycanın paytaxtı Bakı şəhərinin tarixində dərin iz qoymuş məşhur Aşurbəyovlar nəslinin nümayəndəsidir.

Təkcə onu demək kifayətdir ki, Təzəpir məscidini məşhur azərbaycanlı xeyriyyəçi xanım Nabat Aşurbəyova, Əjdərbəy məscidini isə Əjdər Aşurbəyov tikdirib.

Kürəkənə yer tapılmadı

MTN-in Heydər Əliyev hava limanında fəaliyyət göstərən idarəsinin rəisi işləmiş İlqar Aşurbəyov günlərin birində öyrənir ki, Akif Çovdarovun kürəkəni Rəşad Əmircanov əməliyyat müvəkkili kimi onun idarəsində işləməyə göndərilib.

İdarə rəisi yeni işçini qəbul edir və bildirir ki, hava limanında idarənin 10 əməkdaşı cəmi 4 otaqda yerləşib və burada əlavə işçi üçün yer düzəltmək çətindir. Buna görə də, Əmircanov idarənin MTN-in mərkəzi binasındakı otaqlarının birində yerləşdirilib.

Bu cür “hörmətsizlik” Çovdarovun xoşuna gəlməyib.

General idarə rəisini necə təhqir etdi?

Bundan bir neçə gün sonra Akif Çovdarovun rəhbərlik etdiyi idarənin İlqar Aşurbəyovun rəhbərlik etdiyi idarəyə işi düşür. General əməliyyat müvəkkillərinin birinə tapşırır ki, İ.Aşurbəyova zəng edib işlə maraqlansın. Subordinasiyanın bu cür kobud pozulması hava limanındakı idarə rəisinin xoşuna gəlmir və o, əməliyyat müvəkkilinə bildirir ki, Çovdarovun özü zəng etməlidir.

İdarə rəislərinin toqquşması elə həmin gün başlayır, lakin qüvvələr xeyli fərqli idi.

İlqar Aşurbəyov işsiz qalır

Bir neçə ay keçir və İlqar Aşurbəyovun rəhbərlik etdiyi idarə ləğv olunur, özü isə sərəncama göndərilir. Zərərçəkmişin sözlərinə görə, sərəncamda olduğu müddətdə heç kimə yenidən işə bərpa olunması ilə bağlı müraciət etmir.

Yarım ildən də artıq vaxt keçdikdən sonra Aşurbəyovu əməliyyat müvəkkili kimi MTN-in idarələrindən birinə göndərirlər. İdarə rəisinin MTN strukturunda işə yeni başlayanların tutduğu vəzifəyə təyinatı “sözə baxmayan” idarə rəisinin daha bir cəzası olur. Lakin o, raport yazır və təqaüdə çıxır.

İşlər bununla da bitmir.

300 min dollarlıq təhdid

Artıq MTN sistemindən uzaqlaşdırılmış İlqar Aşurbəyovun telefonuna zəng daxil olur və o, nazirliyə çağırılır. Zərərçəkmişin sözlərinə görə, onu Akif Çovdarovun şəxsən özünün, yaxud köməkçisi Rövşən Ədilovun çağırmasını indi xatırlamır.

İlqar Aşurbəyovu qəbul etmiş Akif Çovdarov deyir: “Sən özünü apara bilmədin. Əgər kürəkənimlə düzgün davransaydın, bu gün belə bir vəziyyətdə olmazdın”. Daha sonra general bildirir ki, “ailən, uşaqların var, ağlını başına yığ” və Aşurbəyovdan 300 min dollar gətirməsini tələb edir.

İlqar Aşurbəyov “Passaj” bazarını idarə edən atası Əziz Aşurbəyovdan 175 min dollar götürərək Çovdarovun hüzuruna gəlir və pulu şəxsən generala verir. Akif Çovdarov yerdə qalan 125 min dolları gətirməyə bir neçə gün vaxt verir və tapşırır ki, pul köməkçisi Rövşən Ədilova çatdırılsın.

Əli hər yerdən üzülmüş İlqar Aşurbəyov atasından daha 55 min dollar alır, qaynatası borc-xərc 50 min dollar düzəldir, daha 20 min dolları isə bir dostu verir.

Vəkil Kamandar Nəsibovdan rəsmi şikayət edildi

Zərərçəkmişin çıxışından sonra dövlət ittihamçıları və vəkillər İlqar Aşurbəyova onları maraqlandıran suallarla müraciət etdilər. Akif Çovdarovun vəkili Kamandar Nəsibov prosesin növbəti qalmaqalına imza atdı.

Vəkilin “Siz işiniz barədə hesabatları kimə, yaxud hansı baş idarəyə verirdiniz?” sualına zərərçəkmişin verdiyi cavab K.Nəsibovu qane etmədi və sual təkrarlandıqdan sonra zərərçəkmişin də cavabı təkrarlaması onu özündən çıxardı.

Prosesə sədrlik edən hakim Həbib Həsənov bir neçə dəfə vəkili nizam-intizama dəvət etsə də, Kamandar Nəsibov təhqiredici ifadələrindən əl çəkmədi və hakim vəkil barəsində Vəkillər Kollegiyasına rəsmi müraciət edilməsi barədə qərar qəbul etdi.

Akif Çovdarovun torba ölçüsü

Təqsirləndirilən Akif Çovdarov zərərçəkmişə sualının olmadığını desə də, bu epizodla bağlı söz demək istədiyini bildirdi.

General dedi: “Mən bir şeyi anlamıram. Pulu adamı işə götürəndə alarlar, daha işdən çıxarılmış adamdan mən niyə pul tələb etməli idim ki? Mənə torba tikirlər, bilirəm. Amma bu boyda da yox da…”

Şahidlər İlqar Aşurbəyovun ifadəsini təsdiqlədilər

Prosesdə şahid qismində çıxış etmiş şəxslər zərərçəkmiş İlqar Aşurbəyovun ifadəsində dediklərinin doğru olduğunu təsdiqlədilər.

General ifadə verəcək

Bugünkü iclasda iştirak edən bütün şahidlər dindirildikdən sonra dövlət ittihamçısı “Metak” MMC epizodu ilə bağlı məhkəmə istintaqı aparılan zaman Akif Çovdarovun sağlamlığını bəhanə gətirərək ifadə vermədiyini xatırlatdı.

Prokuror bildirdi ki, təqsirləndirilən indi ifadə verə bilər. Akif Çovdarov isə ifadəsini növbəti iclasda verəcəyini açıqladı.

Çovdarovun “vəsatəti”

Söz alan Akif Çovdarov hakimə şikayətləndi ki, onun sağlamlığı prosesdə nəzərə alınmır. “Mən xəstə adamam, gündə 3-4 saatdan artıq burda otura bilmərəm. Tez-tez isti yemək yeməliyəm, bir çarpayı olmalıdır ki, uzana bilim. Burda isə nə otura bilirəm, nə uzana bilirəm”.

Hakimin “Tez-tez fasilə elan edirik” replikasına Çovdarov cavab verdi: “Başqaları bəlkə də istirahət edir. Mən isə burda necə otururamsa, istirahətdə də eləcə otururam”.

Hakim Həbib Həsənov təqsirləndirilənin sözlərinə cavab olaraq dedi ki, iclasların belə uzanmasının və gec bitməsinin əsas səbəbkarları prosesə gecikməyi adət halına gətirmiş vəkillərdir. Bu sözünə qüvvət olaraq, hakim bundan sonra iclasların saat 11-də deyil, 10-da başlayacağını bildirdi.

Məhkəmə prosesi bazar ertəsi, dekabrın 26-da davam etdiriləcək.

Загрузка...

Manşet xəbərləri

Son xəbərlər

Bizim seçim

Videoxəbər

Fotoxəbər